fsg-ormalingen

eidg. schützäfescht wallis 2015

1. tag

es isch wider ämol sowit, mir reise ans eidg. schützäfescht ins wallis.
( raron ).

mir 14 schützä hei nis ufäm gpp troffä, am mentig dr 22 juni am morgä am halber achti. mr hei ä bus gha vom buser ernst. mit däm simer ins wallis gfahre, mit verlad durä simplon.

guet im wallis aacho, si mer go d'gwehr kontrollierä und d'munition holä. a übrigens, dä schiässplatz isch eigens für das schützäfescht bauä wordä. 166 schibä à 300m, 54 schibä à 50m und 35 schibä à 25m.
uff drei ständ isch do gschossä wordä.

aschliessend hei mir eus ä platz gsuecht, wo hei chönnä bliebä dä nammitag. mir hei eus öppis z'ässä und z'trinkä gholt, in denä unzeligä beizä und ständ, wos do gha hett. s'hett sogar raglett oder brustspitzä ghee.

am nammitag ischs schiässä uf im programm gschtandä. dr wind isch grüselig gangä... ä uusred für di meischtä. aber dä isch zwar gangä, aber immer glich vo west (rächts) nach ost (lings.) do si diä erschtä scho mit hängendä lippä usä cho und hei gsait, "do chasch nid schiässä, bi dämm hurä suowind." wider echli spöter isch dr christian usä cho mit im erschtä chranz. noher isch plötzli nümmä dr wind gschult gsi, mir hei fascht alli chränz gha. so isch dä erschti schiässtag zännt gangä.

am 7 i umme simer ins hotel gangä, öppä 20 minutä vom schiässplatz entfärnt, nach brig. mir hei eus zwäg gmacht und si in ä beiz gangä wo dr matthias reseviert het für eus, 10 minutä z'fuss. mr hei in dr gartäwirtschaft ä aperitiv gno, und si nochher ihnä gangä zum essä. dr wyy het dr klaus und dr matthias usgläsä. es isch nid dr schlächtigscht gsi, natürli ä walliser rotwyy. mir hei alli änander zue prostet. es het zerscht ä gmüessuppä ghe, nochher ä gmischtä salat, aaschliessend äs schwynsfilet, riis, 3 4 sortä gmües und pomm frit. öppis spöter hets no aprikosäsorbet mit schuss zum abruendä gee. es isch bis denn ä glattä obä gsi. 23.30 uhr!

jetz ischs nachtläbä gfrogt gsi. mir si in däm brig ummägloffä, nüt los gsi um diä zit. dr peter und dr matthias hei wöllä tisch in erä gartäbeiz zämästellä, do isch dr beizer cho, und het gseit mir dörfä das nit machä es isch jetzä zuä voruss. noher hets eis käär ghe. s'babsi dr heinz und ich si nochher ins hotel zrugg gloffä und hei eus ufes bett gfreut. was gloffä isch wüsse nummä die wo in derä bar gsi si. öbbä am drü si sie hei cho. guet nacht peter k.

2. tag

s'morgä ässä hets vom 6 a gee. ich bi öppä am halbi 7 dört gsi, dr ersti. die anderä si noch und noch cho, bis uf diä wo nütme z'schiässä gha hei. dr michi dr olli usw. mir si am virtel vor achti abgfahrä richtung schiässalag. mir hei müssä fertig gschossä ha, am viertel vor zwölfi. s'het no dr einti oder dr anderi chranz ghe. im heinz ichs gar nit gloffä, kei chranz. s'babsi het mis gwehr gno, nachdem i fertig g'schossä ha, ihm sis isch worschinlig uusgschossä, und het nach ä paar probeschüess dr verein gno, und het dr chranz doch no gmacht. bravo ! zletscht heimer alli abgrächnet und sie uf ä heimwäg. vorher heimer no einä aghauä zum ä paar fotänä z'machä vos euserä hordä.si si leider nit äso guet usecho als erwartet. jä nu, i ha dänkt, 2 vo jedärä ischtellig, aber nummä eini isch guet gsi, tuät mir leid,i hat nid mehr.

fazid vo däm schützäfescht:

mir hei im ganzä 44 chränz gschossä, ä durchschnitt vo 3 pro teilnämer. das isch guet gsi. leider isches im eintä schlächter gangä, und im anderä besser. d'verheltnis si halt nid immer glich. es muess alles zerscht gschossä si. und dennä chunt d'abrächnig. i ha gschlossä!

jetz di obligatä fotänä...